It-Tielet Ħadd tar-Randan - Riflessjoni fuq l-Ewwel Qari

Il-kapitlu 3 tal-Ktieb tal-Eżodu mhux biss jirrakkonta laqgħa bejn Alla u Mosè, imma huwa wkoll meditazzjoni fuq il-mod kif naraw. Il-viżjoni fil-Bibbja ma tiqafx biss ma’ dak li jidher bl-għajnejn, imma tinvolvi wkoll il-qalb u r-ruħ li jinfetħu għal dan il-misteru. F’din is-silta mill-Eżodu, naraw diversi modi kif wieħed iħares:⁣
⁣
1. Il-kurżità ta’ Mosè – il-ħarsa li tistagħġeb
“Mosè ħares u ra l-għollieq jaqbad bin-nar bla ma jintemm. Mosè qal: ‘Ħa nersaq u nara din id-dehra tal-għaġeb għala mhux jinħaraq l-għolliq.’” (Eżodu 3:2-3)

Mosè jinduna b’xi ħaġa mhux tas-soltu: nar f’nofs għollieq li mhux ikkunsmat. Il-kurżità tiegħu twasslu biex jitbiegħed minn triqtu u jersaq lejn dak li ma jifimx. Hu pass li jwasslu għal xi ħaġa aktar profonda. Hu pass li jwasslu jfittex lil Alla: jgħid “ħa nersaq u nara”.

2. Il-ħarsa ta’ Alla – viżjoni li tagħraf u ssejjaħ
“Il-Mulej rah riesaq biex jara, u Alla sejjaħlu minn qalb l-għollieq u qallu: ‘Mosè, Mosè!’” (Eżodu 3:4)

Qabel Mosè jinduna ma’ min qed jitkellem, Alla diġà ra l-qalb tiegħu. Alla jara lill-bniedem mhux biss kif jidher, imma kif hu fil-fond. Hu jara, jagħraf, u jsejjaħ.

3. Il-biża’ quddiem il-misteru – għajn li tintefa
“Mosè għatta wiċċu, għax beża’ jħares lejn Alla.” (Eżodu 3:6)

Il-bniedem li ftit tal-ħin qabel xtaq jara, issa jibża’. Quddiem il-qdusija ta’ Alla, Mosè jitbiegħed. Il-biża’ tiegħu mhix biss biża’ umana, imma għarfien li Alla hu akbar mill-bniedem. Il-qaddis ma jidhirx kif u meta rridu aħna – irid jiġi milqugħ b’umiltà u silenzju.

4. Il-ħarsa ta’ Alla fuq il-poplu – għajn ta’ ħniena
“Jien ħarist u rajt it-tbatija tal-poplu tiegħi fl-Eġittu. U jien smajt il-karba tagħhom… u għaraft l-uġigħ tagħhom.” (Eżodu 3:7)

Alla jara. U kif jara? B’għajn ta’ ħniena. Hu mhux spettatur indifferenti, imma Missier li jisma’, li jħoss, u li jinżel biex jeħles. Hawnhekk il-viżjoni ta’ Alla hi waħda li twassal lejn il-ħelsien. Alla jara jiddeċiedi li jidħol fl-istorja biex iġib il-ħelsien. Din hi sejħa għalina wkoll: biex aħna wkoll nitgħallmu naraw bl-għajnejn tal-qalb.

5. Mill-għajn għall-kelma – viżjoni li ssir missjoni
“Ejja, mela, ħa nibagħtek għand il-Fargħun biex toħroġ lil ulied Iżrael, il-poplu tiegħi, mill-Eġittu.” (Eżodu 3:10)
“JIEN LI JIEN... Hekk għidilhom lil ulied Iżrael, ‘JIENA-HU bagħatni għandkom.’” (Eżodu 3:14)

Mosè, li beda jara, issa jisma’. Alla jgħidlu ismu u dan l-isem mhux biss tifsira, imma wegħda. Alla hu dak li jkun preżenti, u dak li jkun hemm għall-poplu tiegħu. Mosè jiltaqa’ ma’ Alla u l-viżjoni issa ssir missjoni – li jħabbar lil Alla bl-isem tiegħu u jaġixxi f’ismu.

...............
QARI I
JIENA-HU bagħatni għandkom.
Eż 3:1-8a,13-15

Qari mill-Ktieb tal-Eżodu

F’dak iż-żmien, Mosè kien jirgħa l-merħla ta’ ħatnu Ġetru, qassis ta’ Midjan, u ħa l-merħla ’l hemm fid-deżert, u wasal sa ħdejn Ħoreb, il-muntanja ta’ Alla. Hawn deherlu l-anġlu tal-Mulej f’ħuġġieġa nar qalb l-għollieq. Mosè ħares u ra l-għollieq jaqbad bin-nar bla ma jintemm. Mosè qal: “Ħ nersaq u nara din id-dehra tal-għaġeb: għala mhux jinħaraq l-għllieq?”. Il-Mulej rah riesaq biex jara, u Alla sejjaħlu minn qalb l-għollieq u qallu: “Mosè, Mosè!”. U Mosè wieġeb: “Hawn jien!”. U l-Mulej qallu: “La tersaqx ’l hawn. Neħħi l-qorq minn riġlejk, għax il-post li inti fuqu hu art qaddisa”. U ssokta jgħidlu: “Jien hu Alla ta’ missirijietek: Alla ta’ Abraham, Alla ta’ Iżakk u Alla ta’ Ġakobb”. Mosè għatta wiċċu, għax beża’ jħares lejn Alla.

U l-Mulej qallu: “Jien ħarist u rajt it-tbatija tal-poplu tiegħi fl-Eġittu. U jien smajt il-karba tagħhom minħabba fl-argużini tagħhom u għaraft l-uġigħ tagħhom. Issa nżilt biex neħlishom minn idejn l-Eġizzjani u biex intellagħhom minn dik l-art u neħodhom f’art tajba u wiesgħa, f’art tnixxi ħalib u għasel”.

Mosè reġa’ wieġeb: “Ara, jiena mmur għand ulied Iżrael u ngħidilhom: ‘Alla ta’ missirijietkom bagħatni għandkom’. Huma jistaqsuni: ‘X’jismu?’. Jiena xi ngħidilhom?”. Alla wieġbu: “Jien li Jien”. U kompla jgħidlu: “Hekk għidilhom lil ulied Iżrael: ‘Jiena-Hu bagħatni għandkom’”. U Alla kompla jgħidlu: “Hekk għandek tgħidilhom lil ulied Iżrael: ‘Jaħweh, Alla ta’ missirijietkom, Alla ta’ Abraham, Alla ta’ Iżakk, Alla ta’ Ġakobb, bagħatni għandkom’. Dan ikun ismi għal dejjem u dan l-isem ifakkarkom fija minn nisel għal nisel”.

Il-Kelma tal-Mulej.
R/. Irroddu ħajr lil Alla. ... See MoreSee Less