L-Ewwel Ħadd tar-Randan

Vjaġġ ta’ Memorja u Tama – Riflessjoni fuq l-Ewwel Qari (Dewteronomju 26:4-10)

Mosè kellem lill-poplu u qal: “Il-qassis imbagħad jilqa’ minn idejk il-qoffa, u jqegħedha quddiem l-altar tal-Mulej, Alla tiegħek. Inti mbagħad tgħid hekk quddiem il-Mulej, Alla tiegħek: ‘Missieri kien minn Aram, jiġġerra minn post għal ieħor; imbagħad niżel l-Eġittu u għammar hemm. Żgħir kien l-għadd ta’ niesu, iżda hemmhekk sar poplu kbir, qawwi u kotran.’” (Dewt 26:4-5). Din it-talba li jagħmel il-bniedem li jġib l-ewwel frott tiegħu hija memorja ta’ kif il-poplu ta’ Iżrael kien poplu żgħir u vulnerabbli, u jiddependi kompletament fuq Alla. Il-poplu ta’ Alla wara l-eżilju fil-Babilonja jfakkar il-memorja ta’ kif Alla mexxa l-poplu Tiegħu minn post għall-ieħor, mhux skont il-qawwa tal-poplu, imma skont il-fedeltà Tiegħu.
Mosè jkompli jgħid: “L-Eġizzjani ħaqruna, għakksuna, għabbewna b’xogħol iebes; imma aħna għajjatna lill-Mulej, Alla ta’ missirijietna, u l-Mulej sama’ l-għajta tagħna, ra t-tgħakkis u t-tbatija u d-dwejjaq tagħna, u ħariġna l-Mulej mill-Eġittu, b’id qawwija, bi driegħ merfugħ, b’biża’ kbir, b’sinjali u b’għeġubijiet.” (Dewt 26:6-8). Dan il-kliem juri kif Alla hu dejjem attent għall-għajta tal-poplu tiegħu. Għalkemm l-Iżraeliti għaddew minn tbatija, Alla ħelishom u wassalhom f’post ġdid. Din hija xhieda li Alla ma jħallix lil min jafda fih. Anke fi żminijiet diffiċli, Alla jibqa’ jisma’ u jara t-tbatija tal-poplu tiegħu.
U issa, l-Iżraeliti jaslu għall-mument ta’ ringrazzjament: “U daħħalna f’dan il-post, tana din l-art, art tnixxi ħalib u għasel. U issa, ara, jiena ġibt l-ewwel frott tal-art li tajtni int, Mulej.” (Dewt 26:9-10). Dan l-att ta’ offerta mhux sempliċi obbligu, imma ġest ta’ fidi. L-ewwel frott jitpoġġa quddiem il-Mulej bħala sinjal li dak kollu li għandhom hu don mingħand Alla. Għal Iżrael, speċjalment fi żmien l-eżilju, dan kien messaġġ qawwi – anke jekk tilfu l-art tagħhom, l-fiduċja tagħhom kienet f’Alla li dejjem jipprovdi.
Din ir-riflessjoni tfakkarna li il-fidi tagħna ma tiddependix mis-sitwazzjonijiet tagħna, imma mill-fedeltà ta’ Alla. Kif Alla mexxa u ħeles lill-poplu tiegħu, hekk jagħmel magħna llum. L-istorja tagħna mhijiex waħda ta’ telf imma ta’ tama, għax Alla jibqa’ magħna anke meta l-ħajja tinbidel. Irridu naraw l-ewwel frott tagħna, jiġifieri dak kollu li għandna u li nagħmlu, bħala sinjal ta’ gratitudni u fidi li Alla se jkompli jżomm magħna, illum u dejjem.
..........................
QARI I
Stqarrija tal-fidi tal-poplu ta’ Alla.
Dewt 26:4-10

Qari mill-Ktieb tad-Dewteronomju

Mosè kellem lill-poplu u qal: “Il-qassis imbagħad jilqa’ minn idejk il-qoffa, u jqegħedha quddiem l-altar tal-Mulej, Alla tiegħek. Inti mbagħad tgħid hekk quddiem il-Mulej, Alla tiegħek: ‘Missieri kien minn Aram, jiġġerra minn post għal ieħor; imbagħad niżel l-Eġittu u għammar hemm. Żgħir kien l-għadd ta’ niesu, iżda hemmhekk sar poplu kbir, qawwi u kotran. L-Eġizzjani ħaqruna, għakksuna, għabbewna b’xogħol iebes; imma aħna għajjatna lill-Mulej, Alla ta’ missirijietna, u l-Mulej sama’ l-għajta tagħna, ra t-tgħakkis u t-tbatija u d-dwejjaq tagħna, u ħariġna l-Mulej mill-Eġittu, b’id qawwija, bi driegħ merfugħ, b’biża’ kbir, b’sinjali u b’għeġubijiet, u daħħalna f’dan il-post, tana din l-art, art tnixxi ħalib u għasel. U issa, ara, jiena ġibt l-ewwel frott tal-art li tajtni int, Mulej’.

U int tqiegħdu quddiem il-Mulej, Alla tiegħek, u tadura lill-Mulej, Alla tiegħek”.

Il-Kelma tal-Mulej.
R/. Irroddu ħajr lil Alla. ... See MoreSee Less

... See MoreSee Less